Urigginali di Caitanu Luca La Mantia - 6 nuvèmmiru 2017 - Funti: Jurnali di Sicilia
“Vogghiu èssiri lu prisidenti di tutti li siciliani - cummintau Musumeci -, di tutti chiḍḍi chi mi vutaru e mi dèsiru sustegnu e macari di chiḍḍi chi vutaru pi àutri cannidati o nun vutaru propiu. Vogghiu didicari chista me vittoria ê me' figghi e a li figghi di tutti li siciliani, picchí iḍḍi ànnu dirittu a lu megghiu futuru.”
Pi Neḍḍu Musumeci chistu votu àvi un significatu ca nun si limita sulu a li cunfini dâ Sicilia. “Chistu e’ un risurtatu c'àvi mpurtanza nazziunàli – cummintau Musumeci -, lu centru-destra turnàu nzèmmula e grapríu la strata pi n'appuntamentu puliticu assai mpurtanti chi nta la primavera chi veni avissi a dari all'Italia un guvernu dignu di stu nomu.” Accussí Musumeci cummintau li risurtati di l'ilizziòni a Catania (unni ci sta la sedi di lu so cumitatu) dichiarannu ca “nta lu Labburatoriu Sicilia chistu spirimentu jìu bonu. Comu prisidenti dâ Sicilia, lu me primu cúmpitu e’ chiḍḍu d'arricupirari ḍḍu 50% di siciliani ca nun vosi vutari.”
Neḍḍu Musumeci nascìu a Militeḍḍu, lu 21 jinnaru di lu 1955. Lu so arrivu a Palazzu d'Orleans rapprisenta lu puntu cchiù àutu di la so carrera pulítica e l'urtimu appuntamentu ilitturali so, comu iḍḍu stissu dichiaràu quarchi jòrnu prima di l'ilizzioni ntôn foru dû Jurnali di Sicilia. La so fu na campagna ilitturali mmilinata e chi vitti nu saccu di crítichi supra li “listi mprisintàbbili” chi vínniru di li so' abbirsari pulítici.
“Nu saccu di mali palori e mali figuri mmilinaru chista campagna ilitturali – cummintau Musumeci -, ma tuttu chistu uramai e’ acqua passata. Accamora sentu 'n coḍḍu di mia lu pisu di na granni rispunzabbilitati. Sugnu sicuru ca àiu a 'ffruntàri nu saccu di prubbremi chi ànnu a chi fari cu la drammatica situazziòni dâ me terra, cirtamenti la situazziòni cchiù difficili nta 70 d'autunumía.”
Musumeci, jurnalista pubbricista e lauriatu 'n Scenzi dâ Cumunicazziòni, travagghia comu mpijatu bancariu nta lu Gruppu Unicredit. Già quannu era giuvinottu s'avía appassiunatu a la pulítica, tant'e’ veru ca già a 15 anni avía trasutu nta l'urganizzazziòni giuvanili di lu MSI canusciuta comu “Giovane Italia”. Quannu avía sulu 20 anni, fu cunziggheri cumunali prima nta la so citati, poi macari nta li cumuni di Gravina dî Prachi e Jardinèḍḍi. A 32 anni addivintau sicritariu pruvinciali di lu MSI a Catania e cunzigghieri pruvinciali nta sta pruvincia di lu 1990 sinc'a lu 1993. Nta lu 1994, si cannidau comu prisidenti di la pruvincia câ lista dû Muvimentu Suciali Talianu e vincíu ô balluttaggiu cuntra di Steliu Manciameli (talianu: Stelio Mangiameli). Musumeci fu prisidenti di la pruvincia pi nov'anni e fu ricumfirmatu ô primu turnu cu 310000 priferenzi.
Sempri nta lu 1994, si cannidau comu èuru-parlamintari cu Allianza Nazziunali pi la circuscrizziòni “Italia miridiunali”, e vinni ricumfirmatu nta lu 1999 e lu 2004. Lassau Allianza Nazziunali nta lu 2005 a causa di calipini chi juntàru ô chianu cu Gianfrancu Finị, e funnàu l'”Allianza Siciliana” chi era un muvimentu autunumista di destra pi lu quali Musumeci si cannidau l'annu doppu pâ prima vota a la prisidenza dâ Sicilia. Tannu Musumeci avía pigghiatu lu 5,3% dî voti contra lu 53,1% di Totò Cuffaru (cannidatu pi lu centru-destra) e lu 41,6% di Rita Burzillinu (talianu: Rita Borsellino - cannidata pi lu centru-sinistra).
Ntô 2008 Musumeci pigghiau parti a n'àutra mpurtanti cumpitizzioni ilitturali, chiḍḍa di l'ilizziòni cumunali dâ citati di Catania. Tannu avía vinciutu ô primu turnu lu cannidatu dû centru-destra Rafaeli Stancaneḍḍi (talianu: Raffaele Stancanelli), cu tuttu ca Musumeci avía pigghiatu lu 25% dî voti cû sustegnu di na lista civica. Doppu l'ilizzioni, Allianza Siciliana addivintau parti dû muvimentu La Destra ca pi n'annu appi comu so vicisicritariu nazziunali propiu Neḍḍu Musumeci. Ntô 2011, duranti lu guvernu Birluscuni, Musumeci fu numinatu suttasicritariu pô Ministeru dû travagghiu e dî pulitichi suciali. Ntô 2011 Musumeci si cannidau pâ sicunna vota ô guvernu dâ Sicilia, ma macari tannu nun arriniscíu a júnciri a Palazzu d'Orleans a causa di la vittoria di Rusariu Crucetta (talianu: Rosario Crocetta). Pirò arriniscíu a uttiniri un postu a la Junta Riggiunali Siciliana unni fu capu dâ Cummissioni Antimafia. Ntô 2015 lassau La Destra pi funnari n'àutru muvimentu, chiamatu #Diventeràbellissima. Oi, Neḍḍu Musumeci addivintau prisidenti dâ Sicilia a quasi 63 anni.
Traduttu di: Franciscu Prucopiu
Quest'opera è distribuita con Licenza Creative Commons Attribuzione - Non commerciale - Non opere derivate 4.0 Internazionale.
